Татарстан Республикасы Министрлар Кабинеты җитәкчесе Рөстәм Миңнеханов рәислегендәге Татарстан рәсми делегациясе ике көнлек эш визиты белән (14 нче-15 нче июнь) Төркмәнстанда.
Визит максаты – Төркмәнстанның “Аваза” милли туристик зонасы санатор-курорт объектларының беренче чиратын ачу тантанасында катнашу. Әлеге тантаналы чара бүген иртән үткәрелде – Каспий диңгезе ярындагы заманча “Ватанчы”, “Чарлак” һәм “Хазына” отельләре файдалануга тапшырылды.

Бүген Татарстан Республикасы Премьер-министры Рөстәм Миңнеханов Түбән Камада милли бәйрәм – Сабан туенда катнашты. Шәһәр мәйданына 70 меңнән артык кеше - Түбән Камада яшәүчеләр һәм бөтен республикадан килгән кунаклар җыелган иде.

Бүген Татарстанның хөкүмәт башлыгы Рөстәм Миңнеханов Татарстан Республикасының Әлки муниципаль районына эш визиты белән барды. Аны Татарстан Республикасы Авыл хуҗалыгы һәм азык-төлек министрлыгы вәкилләре һәм хуҗалыклары район территориясендә урнашкан инвестор компания (аерым алганда, “Красный Восток – Агро”) вәкилләре озатып йөрде.
Татарстан Республикасы Премьер-министры “Красный Восток – Агро” ААҖ нең терлекчелек комплексларын карап чыкты, игенчелек һәм үсемлекчелекнең заманча технологияләре белән танышты.

Бүген Татарстан Республикасы Премьер-министры Рөстәм Миңнеханов Татарстан Республикасының Хөкүмәт йортында “ICL-КПО ВС” ААҖ нең Директорлар советы әгъзалары белән очрашты. Очрашуда Сатору Хаяши - Fujitsu Technology Solutions ның башкарма рәис урынбасары, Роже Семприни – “ICL -КПО ВС” ААҖ нең Директорлар советы рәисе, Fujitsu Technology Solutions ның Төньяк-Көнчыгыш Европа, Россия, БДБ илләре төбәгендәге башкарма директоры, Валерий Васильев – “ICL -КПО ВС” ААҖ Директорлар советының рәис урынбасары, Татарстан Республикасы Дәүләт Советы депутаты, Виктор Дьячков – “ICL КПО ВС” ААҖ нең Директорлар советы әгъзасы, “ICL КПО ВС” ААҖ нең генераль директоры һ.б. катнашты.

Татарстан Премьер-министры Рөстәм Миңнеханов социаль әһәмиятле проектларны гамәлгә ашыра торган иҗтимагый оешмалар өчен республика Министрлар Кабинетының ел саен бирелә торган грантларын билгеләү турында Татарстан Республикасы Хөкүмәте карарына кул куйды.

27 нче майдан Татарстанда һәм Россия Федерациясенең башка төбәкләрендә бензин һәм дизель ягулыгының ваклап сату бәяләре арта башлаган. Бәяләрнең үсүе дөньяда, шулай ук Россиядә нефтькә бәя күтәрелә башлауга бәйле.
Бүген Татарстан Республикасы Министрлар Кабинетында узган брифингта бу турыда Татарстан Республикасында ягулык-энергетика ресурсларының сыйфатлылыгын һәм алардан рациональ файдалануны тәэмин итү идарәсе башлыгы Роберт Гыйлаҗиев хәбәр итте. Брифинг Татарстан Республикасының күпләп һәм ваклап сату базарларындагы нефть продуктларының сыйфатына һәм аларга агымдагы бәяләр белән бәйле хәлгә багышланган иде.

Бүген Казанда Татарстан Республикасы Федераль казначылык идарәсенең яңа бинасы ачылды (Вишневский ур., 31).
Бинаны ачу тантанасында Россия Исәп-хисап палатасы рәисе Сергей Степашин, Россия Федерациясе финанслар министрының беренче урынбасары Татьяна Нестеренко, федераль казначылык башлыгы Роман Артюхин, Татарстан Премьер-министры Рөстәм Миңнеханов һәм башкалар катнашты.

Бүген Татарстан Республикасы Министрлар Кабинетында Татарстанның хөкүмәт башлыгы Рөстәм Миңнеханов һәм “ИБМ Восточная Европа/Азия” ҖЧҖ генераль директоры Кирилл Корнильев Татарстан Республикасында IBM ның программалы карарлар чыгару үзәген төзүгә бәйле ниятләр турындагы Беркетмәгә кул куйдылар.
Документка кул куяр алдыннан булган очрашу барышында Татарстан Республикасы Премьер-министры Рөстәм Миңнеханов республика Хөкүмәтенең ИТ-юнәлешне үстерүне өстенлекле эшләрнең берсе дип табуын билгеләп үтте.

Татарстан Республикасында күпфатирлы торак йортларга капиталь ремонт ясау эшләре 2255 йортта башланып киткән, бу 2009 ел программасының 96 процентын тәшкил итә. 3 июньгә алынган мәгълүматларга караганда, 89 йортта әлегә капремонт эшләренә тотынмаганнар.
Бүген “Торак-коммуналь хуҗалыкны төзекләндерүгә ярдәм итү Фонды турында” дигән федераль законны гамәлгә ашыру мәсьәләләре буенча үткәрелгән чираттагы киңәшмәдә бу турыда Татарстан Республикасының төзелеш, архитектура һәм торак-коммуналь хуҗалык министры Марат Хөснуллин әйтте.
Киңәшмәне Татарстан Премьер-министры Рөстәм Миңнеханов үткәрде.

“Нижнекамскнефтехим” акционерлык җәмгыяте бүген тотрыклы эшли, һәм без дөньякүләм икътисади кризис тәмамланганнан соң да аңа акча салачакбыз” – бүген Түбән Камада “Нижнекамскнефтехим” ААҖ акционерларының еллык гомуми җыелышында чыгыш ясаганда, бу сүзләрне Татарстан Республикасы Премьер-министры Рөстәм Миңнеханов әйтте.
Акционерларның еллык гомуми җыелышы еллык хисапны, еллык бухгалтерлык хисабын, шул исәптән 2008 финанс елы нәтиҗәләре буенча керем һәм чыгымнар турындагы хисапны раслады.