Агымдагы елның 5 маенда Чаллы шәһәренең Энтузиастлар бульварында булган фаҗига буенча җинаять эшен тикшерү тәмамланган. Якын көннәрдә материаллар судка юлланачак. Бу хакта бүген Казан Кремлендә узган чарада РФ Тикшерү комитеты рәисе Александр Бастрыкин хәбәр итте. Ул бала гомерен коткарганда һәлак булган 12 яшьлек Данил Садыйковның әти-әнисенә гаеплеләрнең лаеклы җәзасын алачагын ышандырды.
Агымдагы елның 12 июлендә РФ Президентының экстремаль шартларда кеше гомерен коткаруда күрсәткән батырлыгы өчен Данил Садыйковны үлгәннән соң “Батырлык ордены” белән бүләкләү турындагы Указы дөнья күргән иде. Тикшерү комитеты башлыгы бүген Казан Кремлендә Данилның әти-әнисе – Айдар һәм Наталья Садыйковларга шушы дәүләт бүләген тапшырды. Чарага Данилның кыз туганы Диана да килгән иде. Очрашу һәм бүләкләү чарасы ТР Президенты Рөстәм Миңнеханов катнашында узды.

ТР Президенты Рөстәм Миңнеахнов Россиядә кыска көпшәле коралны легальләштерүгә каршы булуын белдерде. Бу хакта ул бүген республиканың бер төркем ММЧ вәкилләренә “Корал турында”гы законны реформалаштыру мәсьәләсенә аңлатма биргәндә белдерде.

Бүген Татарстан Президенты Рөстәм Миңнеханов Worldskills International халыкара коммерцияле булмаган оешма башлыгы Саймон Бартли белән очрашты. Очрашуда шулай ук Worldskills International халыкара хәрәкәтенең Россиядән рәсми делегаты Лидия Фролова, ТР Президенты ярдәмчесе Айрат Хәйруллин, вице-премьер – Сәнәгать һәм сәүдә министры Равил Зарипов, ТР Мәгариф һәм фән министры Альберт Гыйльметдинов, Казан Башкарма комитеты җитәкчесе Алексей Песошин катнашты.

Бүген Казанда Татарстан Президенты Рөстәм Миңнеханов Американың Carnegie Mellon University iCarnegie бүлеге директоры Гил Таран белән очрашты. ТР Хөкүмәт йортында узган очрашуда Татарстан Президенты ярдәмчесе Айрат Хәйруллин, вице-премьер – ТР мәгълүматлаштыру һәм элемтә министры Роман Шәйхетдинов, республика мәгариф һәм фән министры Альберт Гыйльметдинов, Казан (Идел буе) федераль университеты ректоры Илшат Гафуров катнашты.

Бүген Россия Президенты Владимир Путин Татарстан Президенты Рөстәм Миңнеханов һәм эшмәкәрлек җәмгыяте, мәгариф һәм сәламәтлек саклау өлкәләре вәкилләре белән төбәктәге социаль-икътисади вәзгыять буенча фикер алышты.

Nike компаниясе Татарстан Республикасы белән партнерлык мөнәсәбәтләрен үстерергә ниятли. Бу хакта бүген Татарстан Республикасы Президенты Рөстәм Миңнеханов белән очрашуда “Найк” (Nike) генераль директоры Эрик Куэно белдерде. Очрашу Татарстан Республикасы Хөкүмәт йортында узды.

Бүген Казанда Татарстан Премьер-министры Илдар Халиков һәм Казахстан Республикасының Актүбә өлкәсе хакиме урынбасары Марат Тагимов очрашты. ТР Хөкүмәт Йортындагы очрашуда шулай ук ТР вице-премьеры – авыл хуҗалыгы һәм азык-төлек министры Марат Әхмәтов, ТР вице-премьеры – сәнәгать һәм сәүдә министры Равил Зарипов, Татарстан Премьер-министрының тышкы икътисади эшчәнлек буенча ярдәмчесе Альфред Закиров катнашты.

Бүген Казанда ТР Президенты Рөстәм Миңнеханов Польшаның Поморский воеводалыгы делегациясе белән очрашты. Делегациягә воеводалык маршалы Мечислав Струк җитәкчелек итә.

Бүген ТР Хезмәт, мәшгульлек һәм социаль яклау министры урынбасары Клара Таҗетдинова Татарстанның Министрлар Кабинетында узган брифингта, 2012 нче елның 23 июленә ТР халкының мәшгульлек хезмәте органнарында учетта торган эшсез саналган уку йортларын тәмамлаучылар турында мәгълүмат җиткерде.

2012 нче елның 17 маенда Россия World Skills International коммерцияле булмаган халыкара оешмасының тулы хокуклы әгъзасы була, бу илгә һөнәри осталык буенча чемпионат уздыру хокукын бирә. Шул рәвешле, 2019 нчы елда Казанның эшче һөнәрләр буенча халыкара чемпионат кабул итүе ихтимал. Бу хакта бүген Татарстан Хөкүмәт йортында узган брифингта ТР Хезмәт, мәшгульлек һәм социаль яклау министры урынбасары Клара Таҗетдинова хәбәр итте.