Франция эшлекле даирәләре миссиясе бу көннәрдә Татарстан башкаласында. Сәфәр “Франция предприятиеләре хәрәкәте” бизнес-берләшмәләренең Идел буе төбәкләренә теплоходта икътисади миссиясе кысаларында оештырылды. Делегациягә бизнес-берләшмәнең Шампань-Арден төбәге президенты Пьер Посеме белән төбәк советы президенты Жан Поль Баши җитәкчелек итә. Делегация әгъзалары арасында халыкара юнәлешләрдә пассажирлар һәм йөк ташучылар, бетон эшләнмәләр, инфраструктура өчен җиһазлар җитештерүчеләр, финанслар, мөлкәт, күчемсез милекне сату-сатып алу белән идарә буенча консалтинг хезмәте күрсәтүчеләр, сәнәгать өчен хезмәтләрнең тулы спектрын күрсәтүчеләр һ.б. бар.

Бу көннәрдә Татарстан башкаласы Россия төбәкләреннән һәм якын чит илләрдән музей элитасын үзенә җыйды. 14-18 сентябрь көннәрендә Казанда Халыкара Музейлар форумы уза. Җыен Россиянең эре төбәк музейларының берсе -Татарстан Милли музееның 115 еллык юбилее кысаларында оештырылды. Бүген форум делегатлары белән Хөкүмәт йортында ТР Президенты Рөстәм Миңнеханов очрашты. Очрашуда шулай ук ТР Премьер-министры урынбасары-мәдәният министры Зилә Вәлиева катнашты.

Халыкара Музейлар форумын уздыру урыны итеп Казанның бик лаеклы сайлануын очрашуга килгән музей хезмәткәрләре кат-кат билгеләп узды. Алар фикеренчә, бу республиканың мәдәният һәм туризм проектларын үстерүгә керткән өлешен югары бәяләү булып тора. Татарстан хакимият, җәмгыять һәм мәдәниятнең бергә кушылу өлгесе булып тора. Алар бу юнәлешнең зур перспективасын аңлаган өчен ТР Президентына рәхмәт белдерделәр.

Бүген Казанның Зур Кызыл урамында Федераль куркынычсызлык хезмәте ТР буенча идарәсенең яңа бинасы ачылды. Яңа бинаны ачу тантанасында Федераль куркынычсызлык хезмәте директоры Александр Бортников һәм Татарстан Президенты Рөстәм Миңнеханов, Федераль куркынычсызлык хезмәте ветераннары, ведомстволар вәкилләре катнашты.

Александр Бортников бинаны ачу тантанасында белдергәнчә, бүгенге көн Федераль куркынычсызлык хезмәте ТР буенча идарәсе өчен генә түгел, ә бөтен ведомство өчен истәлекле көн булды. Яңа бина иң заманча таләпләргә җавап бирә.

Татарстан Президенты Рөстәм Миңнеханов Россия Президенты Дмитрий Медведев адресына 45 яшь тулуы уңаеннан котлау телеграммасы юллады.

Бүген ТР Министрлар Кабинетында Татарстан Президенты Рөстәм Миңнеханов Федераль балыкчылык агентлыгы җитәкчесе Андрей Крайний белән очрашты.

Очрашуда Татарстан Республикасы һәм Федераль балыкчылык агентлыгы арасында “2009-2014 елларда балык хуҗалыгы комплексының ресурс потенциалын файдалану һәм үстерүдә нәтиҗәлелекне арттыру” дигән Федераль максатчан программаны гамәлгә ашыру өлкәсендә хезмәттәшлек турындагы килешү имзаланды.

“Кече бизнес. Финанслау һәм дәүләт ярдәме”. Бүген Казанда “ОПОРА РОССИИ” кече һәм урта эшмәкәрлекне үстерү гомумроссия җәмгыяте белән “ОПОРА-КРЕДИТ” медиахолдингы оештырган конференция әнә шулай атала. ТР Кече һәм урта эшмәкәрлекне үстерү агентлыгы булышлыгында уздырылучы бу чараның максаты – эшмәкәрләрне гамәлдәге дәүләт ярдәме механизмнары, аларны финанслау өчен каралган инструментлар белән якыннан таныштыру. IT–паркта видеоэлемтә режимында оештырылган конференцияне ачу тантанасында ТР Президенты Рөстәм Миңнеханов, Премьер-министрның беренче урынбасары Равил Моратов, “ОПОРА РОССИИ” президенты, Кече һәм урта эшмәкәрлекне үстерү буенча Хөкүмәт комиссиясе рәисе урынбасары Сергей Борисов һ.б. катнашты.

Татарстан Президенты Рөстәм Миңнеханов Казанның Чехов районында оештырылган авыл хуҗалыгы продукциясен сату ярминкәсендә катнашты.

Республика башлыгын ТР Премьер-министры урынбасары – авыл хуҗалыгы һәм азык-төлек министры Марат Әхмәтов, Казан мэры Илсур Метшин, Татарстанның Саба районы башлыгы Рәис Миңнеханов озатып йөрде.

Ярминкәдә чагыштырмача арзан бәядән авыл хуҗалыгы продукциясенең киң ассортименты: бәрәңге, яшелчә, төрле ярмалар, ит һәм сөт ризыклары тәкъдим ителгән иде. Бәрәңге төялгән йөк машиналары янында сәүдә аеруча кызу барды. “Икенче икмәкне” килограммын – 17, ә карабодайны 35 сумга сатып алырга мөмкин иде.

Бүген иртән Татарстан Премьер-министры Илдар Халиков Казанның Мәскәү районында оештырылган ярминкәдә булды. Илдар Халиков сәүдәнең ничек баруын карады, сатып алучылар белән аралашты.

Ярминкәдә чагыштырмача арзан бәядән республиканың Буа һәм Чүпрәле районнары продукциясенең киң ассортименты тәкъдим ителгән иде. Биредә бәрәңгенең килограммы – 17, карабодай – 35, югары сортлы он 12 сумга сатылды.

Бүген “Корстон” сәүдә-күңел ачу комплексында ТР Хөкүмәте һәм РФ Гражданнар оборонасы, гадәттән тыш хәлләр һәм табигать бәла-казалары нәтиҗәләрен бетерү буенча министрлыгы арасында мөһим килешү имзанды.

Бүген ТР Президенты Рөстәм Миңнеханов Төньяк Осетия-Алания Республикасы башлыгы Таймураз Мамсуровка кайгы уртаклашу телеграммасы юллады.

“Татарстан халкы кичә Владикавказның Үзәк базарында булган шартлау, анда һәлак булучылар һәм җәрәхәт алучылар турындагы хәбәрне сызлану, әрнү белән кабул итте. Күпмилләтле Татарстан халкы һәлак булучыларның якыннарының, барлык Төньяк Осетия халкының кайгысын уртаклаша, аларга теләктәшлек белдерә”, -дигән юллар бар бу телеграммада.