Бүген Казан Кремлендагы Татарстан Республикасы Президенты Резиденциясендә Төрекмәнстан Республикасы делегациясе булды. ТР Президенты Рөстәм әфәнде Миңнеханов Төрекмәнстандагы коллегасы Гурбангулы әфәнде Бердымөхәммәдов җитәкчелегендәге делегацияне Татарстан җирендә ихлас сәламләп, аларның Россия Федерациясенә эш сәфәре кысаларында Татарстанга да килү җае табуларына рәхмәт белдерде. Быел апрельда Төрекмәнстан чабышкысы көннәре белән бергә Татарстан мәдәнияте көннәре дә уздырылуын искәртеп, анда барган Татарстан делегациясенә кадер-хөрмәт күрсәтелүе өчен Р.Миңнеханов олы рәхмәт сүзләре җиткерде.

Бүген Казанда “Бизнес-успех 2012” бөтенроссия конкурсының төбәк этабы узды. Конкурска нәтиҗә ясау чарасында ТР Президенты Рөстәм Миңнеханов катнашты. Татарстан Президенты залда утыручыларны сәламләде һәм республика өчен “Бизнес-успех” конкурсында катнашу дәрәҗәле дип белдерде. Рөстәм Миңнеханов хакимият белән бизнес янәшә булырга тиеш диде. ТР Президенты ассызыклаганча, кече һәм урта бизнес – беренче чиратта республика муниципалитетларының эшчәнлек кыры, эш урыннары, ул гомумән республиканы һәм илне формалаштыручы урта класс.

Бүген Төркмәнстан рәсми делегациясе әгъзалары “Казан вертолет заводы” ААҖнең производство цехларында булды. Кунакларны Татарстан Республикасы Премьер-министры Илдар Халиков, ТР сәнәгать һәм сәүдә министры Равил Зарипов, ТР икътисад министры Мидхәт Шаһиәхмәтов һ.б. озатып йөрде.

Бүген Дәүләт Советы Рәисе Фәрит Мөхәммәтшин һәм ТР Премьер-министры урынбасары – авыл хуҗалыгы һәм азык-төлек министры Марат Әхмәтов республиканың Аксубай, Чирмешән һәм Нурлат районнарында булды, анда алар язгы кыр эшләре барышы белән танышты.

Бүген Төркмәнстан делегациясе ТР Алабуга районында булды. Делегация составында сәүдә һәм тышкы икътисади элемтәләр министры Баяр Абаев, икътисад һәм үсеш министры Бяшиммурад Ходжамеммедов, коммуналь хуҗалык министры Арслан Ягшимаммедов бар.

Татарстан җирендә узучы “Каравон” рус фольклоры бәйрәме быел юбилеен – 20 еллыгын билгеләп үтә. Шуңа да бу юлы бәйрәм тагын да колачлырак булыр дип көтелә. Быел “Каравон” кунакларны Лаеш районының Русское Никольское авылында 26 май көнне кабул итәчәк. Фольклор бәйрәменең үзенчәлекләре белән бүген ТР Хөкүмәт йортында узган брифингта мәдәният министры урынбасары Ирада Әюпова белән Лаеш муниципаль районының Башкарма комитеты рәисе Михаил Фадеев таныштырды.

Бүген Төрекмәнстан рәсми делегациясенең Татарстан Республикасына эшлекле визиты башлана. Делегация Төрекмәнстан Президенты Корбануглы Бәрдымөхәммәдовны озатып йөри. Исегезгә төшерәбез: Татарстанга сәфәр Корбануглы Бәрдымөхәммәдовның Русия Федерациясенә эшлекле сәфәре кысаларында башкарыла. Иртән "Казан" халыкара һава аланына Төрекмәнстан рәсми делегациясе әгъзалары килеп төште. Кунаклары Татарстан Республикасы Премьер-министры Илдар Халиков, ТР сәнәгать һәм сәүдә министры Равил Зарипов, ТР мәгариф һәм фән министры Альберт Гыйльметдинов каршы алды.

Бүген Казанда “Бердәм Россия” партиясе Татарстан төбәк бүлегенең XIX конференциясе узды. Анда ТР Президенты Аппараты җитәкчесе Юрий Камалтынов, партиянең Татарстан төбәк бүлеге сәяси советы Секретаре, ТР Дәүләт Советы Рәисе Фәрит Мөхәммәтшин, ТР Премьер-министры урынбасары Зилә Вәлиева, Татарстан төбәк бүлеге башкарма комитеты башлыгы Виктор Бударин, партия әгъзалары һәм тарафдарлары катнашты.

Бүген ТР Дәүләт Советында Татарстан Республикасы Дәүләт Советы Рәисе, ТР Волейбол федерациясе президенты Фәрит Мөхәммәтшин һәм “Зенит-Казан” волейбол клубы җитәкчеләре журналистлар белән очрашты. Очрашу “Зенит-Казан” волейбол клубының 12 еллыгына багышланган, клуб 2000 елның 13 маенда оештырылган булган.