Узган ел хезмәт хакларын түләү буенча бурычлары булган 77 оешманың 17 се буенча прокуратурага һәм дәүләт хезмәт инспекциясенә мөрәҗәгать иткәннәр. Иң күп бурыч җыйган оешмалар исемлегендә авиатранспорт предприятиеләре - беренче. Мисалга, хезмәт өчен түләнергә тиеш булган акчалар буенча «Ак Барс Аэро» ААҖнең 35,3 млн. сум, «Татарстан авиакомпаниясе» ААҗнең 30,5 млн сум бурычы бар. Бу хакта бүген Россия федераль монополиягә каршы хезмәтнең уку-методик үзәгендә үткән ТР Хезмәт, мәшгульлек һәм социаль яклау министрлыгы коллегиясе утырышында министр Айрат Шәфигуллин белдерде.

Төп статистик мәгълүматларның ачык булуы дәүләт хакимияте һәм җирле үзидарә органнарының чиста эшләвенә этәргеч була һәм түрәләрнең нәтиҗәле эшләвенә стимул булырга мөмкин. Мондый фикерне бүген Татарстан Премьер-министры Илдар Халиков Татарстан Республикасы буенча дәүләт статистика Федераль хезмәте территориаль органының (Татарстанстат) йомгаклау коллегиясендә җиткерде.

Бүген Татарстан Республикасы Президенты Рөстәм Миңнеханов көннең икенче яртысында Россия Президенты каршындагы Икътисадый совет президиумы утырышында катнашты. Утырышны Владимир Путин уздырды. Көн тәртибенә илнең торак-коммуналь комплексының эффективлыгы мәсьәләләре чыгарылды.Икътисадый советта катнашучылар - ведомстволар җитәкчеләре, губернаторлар, экспертлар җәмәгатьчелеге вәкилләре - идарә компанияләре эшен контрольдә тоту, тарифлар формалаштыру, тузган коммуналь челтәрләрне ремонтлау кебек мәсьәләләр турында сөйләштеләр.

2013 елда Татарстанда хезмәт хаклары буенча бурычларның үсеше күзәтелде. 2014 елның 1 гыйнварына бурыч 119 млн сум тәшкил итте. Бу хакта бүген ТР хезмәт, мәшгульлек һәм социаль яклау министры Айрат Шәфигуллин ведомствоның йомгаклау коллегия утырышында хәбәр итте.
Утырыш Россия Федераль монополиягә каршы хезмәтенең уку-методик үзәгендә узды. Чарада ТР Премьер-министры Илдар Халиков, ТР Премьер-министры урынбасары - мәгълүматлаштыру һәм элемтә министры Роман Шәйхетдинов, , РФ Хезмәт һәм социаль яклау министры урынбасары Андрей Пудов, ТР Хөкүмәте вице-премьеры Юрий Камалтынов катнашты.

2013 нче елда Татарстан Республикасы Тарифлар буенча дәүләт комитеты тарафыннан тарифлар буенча 2600 ләп карар, барлык муниципаль берәмлекләрдә торак-коммуналь хуҗалык өчен түләү буенча төбәк стандартларының 220 меңгә якын күрсәткече кабул ителгән. Бу хакта бүген дәүләт комитетының 2013 нче елгы эшчәнлеккә йомгак ясауга һәм 2014 нче елга бурычлар билгеләүгә багышланган коллегия утырышында комитет рәисе Марат Зарипов хәбәр итте. Утырышта ТР Премьер-министры Илдар Халиков, ТР Дәүләт Советының икътисад, инвестицияләр һәм эшмәкәрлек буенча комитеты рәисе Марат Галиев, ТР муниципаль берәмлекләре советы рәисе Минсәгыйть Шакиров катнашты.

Бүген Казан Кремлендә Татарстан Республикасы Дәүләт Киңәшчесе Минтимер Шәймиев РФ Сәнгать академиясе вице-президенты, В.И.Суриков исемендәге Мәскәү дәүләт академия сәнгать институты ректоры, профессор Анатолий Любавин белән очрашты.

Татарстан Республикасыннан Россия Федерациясе Федераль Собраниесе Дәүләт Думасында депутатлар корпусы бик көчле, һәм без әлеге потенциалны кулланырга тиеш. Бу хакта бүген Татарстан Республикасы Президенты Рөстәм Миңнеханов Татарстан Республикасыннан Россия Федерациясе Федераль Собраниесе Дәүләт Думасы депутатлары һәм Федерация Советы әгъзалары белән очрашуында белдерде. Очрашу ТР Хөкүмәт Йортында узды, анда ТР Дәүләт Советы Рәисе Фәрид Мөхәммәтшин, ТР Президенты аппараты җитәкчесе Әсгать Сәфәров, республика министрлары һәм башкалар катнашты. Фәрид Мөхәммәтшин хәбәр иткәнчә, бүгенге чара гадәткә керде инде, 2013 елда ТРннан РФ Дәүләт Думасында депутатларның эшчәнлегенә нәтиҗәләр ясарга һәм яңа елдагы бурычлары турында сөйләшергә кирәк.

ТР Министрлар Кабинеты белән “Почта России” ФДУП арасында Татарстан территориясендә Росссия почтасы элемтәсен камилләштерү буенча документ имзаланды. ТР Премьер-министры Илдар Халиков һәм “Россия почтасы” ФДУП генераль директоры Дмитрий Страшнов кул куйган әлеге рәсми кәгазьдә Казан почта логистик үзәге төзү мәсьәләсе буенча хезмәттәшлек итү күздә тотыла.