Бүген ТР Министрлар Кабинетында Татарстан Президенты Рөстәм Миңнеханов “Россия Саклык банкы” ААҖ президенты, идарә рәисе Герман Греф белән очрашты.

Күптән түгел РФ Президенты Указы белән ТР Югары суды рәисе итеп элек Югары суд рәисе урынбасары вазифаларын башкарган Илгиз Гыйләҗев билгеләнгән иде. Бүген яңа рәис республика Югары суды коллективына рәсми рәвештә тәкъдим ителде. Тантанада РФ Югары суды рәисе Вячеслав Лебедев, ТР Президенты Рөстәм Миңнеханов, Дәүләт Советы рәисе Фәрит Мөхәммәтшин һ.б. катнашты.

Җәмәгать туклануын оештыру өлкәсендә дөнья лидерларының берсе – Франциянең “Sodexо” компаниясе Казанның дәвалау учреждениеләрендә туклануны оештыруга җәлеп ителергә мөмкин. Бүген ТР Премьер-министры Илдар Халиковның “Sodexо” компаниясенең Россия буенча генераль директоры Эди Перисик белән очрашуында шуны күздә тоткан проект тәкъдим ителде. Очрашуда шулай ук ТР сәламәтлек саклау министры Айрат Фәррахов белән Роспотребнадзорның ТР буенча идарәсе җитәкчесе Марина Патяшина катнашты.

Кичә Татарстан Республикасы Президенты Рөстәм Миңнеханов “Дубаи Перл” компаниясе җитәкчелеге белән очрашты. Яклар Казанда дөнья стандартларына җавап бирүче халыкара күргәзмә-сәүдә үзәген проектлау һәм төзү кысаларында хезмәттәшлек итү мөмкинлекләре хакында фикер алышты.

Бразилия бизнес-делегациясе танышу визиты белән Татарстан Республикасына килергә мөмкин. 10 май көнне Татарстан Республикасы Президенты Рөстәм Миңнехановның Бразилия икътисади үсеш министры урынбасары, «ApexBrasil» агентлыгы башкаручы директоры, WAIPA президенты Алессандро Тейшера белән очрашуы вакытында әлеге визитны оештыру хакында сүз барды.

Татарстан җитди икътисади потенциалга ия. Ләкин әлегә аның хакында дөньяда аз беләләр. Дубайда AIM-2011 форумы ачылышыннан соң, бүген ММЧ сорауларына җавабында ТР Президенты Рөстәм Миңнеханов шулай дип белдерде.

Россиянең икътисади үсештә булган төбәкләренең берсе буларак, Татарстанны Берләшкән Гарәп Әмирлекләре белән хезмәттәшлек кызыксындыра. Бүген тышкы сәүдә министры Лубна бинт Әл Касыйми белән очрашу вакытында ТР Президенты Рөстәм Миңнеханов шулай дип белдерде.

“Казан” тимер юл станциясе белән “Казан” халыкара аэропорты арасында интермодаль пассажирлар ташу проектын гамәлгә ашыру өчен кирәкле инфраструктура төзелеше 2012 елның 31 декабренә тәмамланырга тиеш. Бу хакта бүген журналистларга ТР Хөкүмәт йортында узган брифингта ТР транспорт һәм юл хуҗалыгы министры урынбасары Азат Галиәхмәтов җиткерде. Универсиадага кадәр әлеге аралыкта интермодаль пассажирлар ташуны оештыру хакында сөйләшүгә шулай ук Казан шәһәре Башкарма комитеты җитәкчесе Алексей Песошин, Горький тимер юлы җитәкчесенең Казан төбәге буенча урынбасары Александр Черемнов, Лаеш муниципаль районы башлыгы Михаил Афанасьев килгән иде.

Бүген ТР җитәкчелеге, Татарстан башкаласының Җиңү паркындагы Дан мемориалы колоннадасы янында, хәрбиләр хасил иткән коридор аша үтеп, Бөек Ватан сугышында фашизмны Җиңүнең 66 еллыгы уңаеннан Мәңгелек ут янында башланган тантанада катнашты.

Кадерле татарстанлылар! Республикабыз Дәүләт Советы, Хөкүмәте һәм шәхсән үз исемемнән сезне Бөек Ватан сугышында Җиңүнең 66 еллыгы уңаеннан чын күңелдән котлыйм.

1945 елның 9 мае күпмилләтле Ватаныбыз елъязмасына зур тантана һәм матәм көне, азатлыкны яклап калу һәм яңа тормышка аяк басу дәвере буларак кереп калды. Бу – даны тоныкланмас бәйрәм, ул фашизмны тар-мар иткән бөек илебезнең һәрбер гражданы өчен изге һәм аңлаешлы. Туган җир азатлыгы өчен гомерен дә кызганмаган каһарманнарга, дошманнан үч алу өчен тылда армый-талмый дәһшәтле корал җитештергән фидакарьләргә булган чиксез рәхмәт хисләребез күңелләребездә кабат яңара.