Бүген Татарстан Республикасы Президенты Рөстәм Миңнеханов Төрекмәнстан Икътисад һәм үсеш министры Вепа Абделхәкимов җитәкчелегендәге делегациясе белән очрашты. Очрашу Татарстан Республикасы Президентының Казан кремлендәге резиденциясендә узды. Исегезгә төшерәбез, Төрекмәнстанның әлеге вәкиллекле делегациясе Татарстанга сәүдә-икътисадый, фәнни-техник һәм мәдәни хезмәттәшлеге буенча Төрекмәнстан-Татарстан уртак эш төркеменең икенче утырышында катнашу өчен килде.

Күп фатирлы торак йортларны капиталь ремонтлау программасы – Россия Федерациясе җитәкчелеге булдырган программаларның иң нәтиҗәлеләренең берсе. Мондый фикерне бүген Мәскәүдә “Россия бүген” ХМАнда “Күп фатирлы торак йортларны капиталь ремонтлау” темасына узган матбугат конференциясендә Татарстан Республикасы Президенты Рөстәм Миңнеханов белдерде. Чарада шулай ук РФ төзелеш һәм ТКХ министры урынбасары Андрей Чибис, РФ Дәүләт Думасының төзелеш сәясәте һәм ТКХ буенча комитеты рәисе Галина Хованская, Татарстан Республикасы төзелеш, архитектура һәм ТКХ министры Ирек Фәйзуллин катнаштылар.

Бүген “Казан” халыкара аэропортына Перу Республикасы Президенты Ольянто Умала самолеты килде. Кунакны гадәттәгечә милли икмәк һәм чәк-чәк белән каршы алдылар. Очрашуда Татарстан Премьер-министры Илдар Халиков, ТР сәнәгать һәм сәүдә министрының беренче урынбасары Руслан Кәбиров, Россия Тышкы эшләр министрлыгының Казандагы вәкиле Радик Вахитов катнашты.

Бүген, 12 ноябрь көнне ТР Дәүләт Советы Рәисе Фәрит Мөхәммәтшин Татарстанның иң өлкән ял йортларыннан саналган «Ижминводы» шифаханәсе хезмәткәрләрен учреждениенең 90 яшьлек юбилее белән тәбрикләде.

Бүген “Бөтенроссия җирле үзидарә советы” ҖЧҖ Гомумроссия иҗтимагый оешмасы Татарстан төбәк бүлегенең хисап-сайлау конференциясе узды. Анда катнашучыларны Татарстан Республикасы Дәүләт Советы Рәисе Фәрит Мөхәммәтшин сәламләде.

Киләсе ел Татарстанда парклар һәм скверлар елы итеп игълан ителде. Шул уңайдан, башкаланың зооботаника бакчасы да зур үзгәрешләр кичерәчәк. ТР Президенты Рөстәм Миңнеханов Указы нигезендә, “Татинвестгражданпроект” институты объектны төзекләндерү буенча проект эскизы төзегән. Әлеге оешманың директоры Гадел Хөснетдинов бүген ТР Хөкүмәтендә узган брифингта хәбәр иткәнчә, “түгәрәк өстәл”ләр оештырып, проектны өйрәнәчәкләр, тикшерәчәкләр һәм бер ай эчендә ул расланырга тиеш. Зооботаника бакчасын төзекләндерү эшләре исә киләсе ел башына планлаштырыла.

Бүген Г. Камал исемендәге Татар дәүләт академия театрында мәшһүр режиссер Марсель Сәлимҗановның тууына 80 ел тулуны билгеләп үттеләр.

Чарага Татарстан Республикасы Дәүләт Киңәшчесе Минтимир Шәймиев, ТР Дәүләт Советы Рәисе Фәрит Мөхәммәтшин, ТР Мәдәният министрлыгы вәкилләре, сәнгать әһелләре һәм Марсель Сәлимҗанов шәхесен, иҗатын ихтирам итүчеләр килгән иде.

Бүген Казанның "Пирамида" мәдәни-күңел ачу комплексында, эчке эшләр органнары хезмәткәрләренең һөнәри бәйрәмнәре уңаеннан, зур тантана уздырылды. Полиция вәкилләрен Татарстан Президенты Рөстәм Миңнеханов тәбрикләде. Тантанада шулай ук ТР Дәүләт Советы Рәисе Фәрит Мөхәммәтшин, ТР Президент Аппараты җитәкчесе Әсгать Сәфәров, ТР буенча Баш федераль инспектор Ренат Тимерҗанов, ТР буенча Эчке эшләр министры Артем Хохорин, министрлык аппаратының структур бүлекчәләре җитәкчеләре, эчке эшләр органнары ветераннары һәм хезмәткәрләре, ТР буенча ЭЭМ каршындагы Иҗтимагый совет әгъзалары һәм башкалар катнашты.